يا ابن امك ..فزلكه انثي

جه في دماغك ايه؟ اني بشتمك صح؟ 
طب سالت نفسك ليه اعتبرتها شتيمه ؟!!
هو انتي مش ابن امك؟
ولا امك بقيت عوره ؟
هتقولي لا انا ابن ابويا _علشان راجل وانا ابن راجل مش بن ست!!
هتقولي علشان بيقصدوا بيها اني فرفور!!
ركز تاني في كلامك راجع تاني كلامك!! هو مش انت بن راجل وست؟؟؟؟
بلاش دي اعتبرتها شتيمه علشان شايفها قله ادب ان حد يجيب سيره امك او يندهك بيها؟؟
طب تفتكر لو انت صح .. ربنا هيقول : يونس بن متي او عيسي بن مريم؟!!
ولا انت شايف نفسك احسن ولا ايه؟؟



كلامي ده بما اني ام وتعبانه وطالع عنيا مع ابني وفي الاخر يستعر او يتحرج لو حد ندهوه باسم امه!!!

كسرت حدودي

انا راح اكتب من غير قيود .

. ولا ههتم بورقه ولا حدود

مهما بنوا ادامي سدود ..

هكتب وهكون موجود

فاكرين قصه الاخدود ..

مبخفش الا من رب الوجود

مهما كان عدوي لدود ..

ومهما كان في حسود

انا راح اكتب من غير قيود

كل رياح تجي تهز عود

حبه مقاومه وحبه شرود

مهما ده فرق وقال هسود

راح انا هكتب من غير قيود

يا مدوناتي غير حياتي

يا مدوناتي غير حياتي

 حديث وكتاب وجمله غيروا حياتي زي ماانا عايزه وركزوا اوي في زي ماانا عايزه,, اراد الله ثم اردت,, فكنت,,

نبدا من الاول علشان تفهموا معايا الموضوع

الحديث : ايما امرأه صلت خمسها وصامت شهرهاوحصنت فرجها  .... واطاعت زوجها قيل لها ادخلي من اي ابواب الجنه شئتي

الكتاب :" رجال من المريخ ونساء من الزهره "

الجمله : غضبك من السلوك لا ينصب علي الفاعل

لسه مفهمتوش صح نفهمكم عادي ..                                                                                               

الواقتي انا قررت ادخل الجنه- طبعا بأذن الله ورحمته- فقريت حديث ادخلها ازاي بسهوله  طلع اربع حاجات تلاته منهم سهلين  الرابعه بقي الي عليها الكلام  اطاعت زوجها طبعا كلنا فاكرنها بحاضر وطيب وخلصت ,, هي يمكن تكون كده بس كده بس؟؟!! اكيد مش مظبوط مهو اصل احنا الواقتي بنات اليومين دول كلمه حاضر دي مش بالساهل لازم تمر علي كل اعضاء الجسم واهمهم العقل علشان تطلع والا سنتحول جميعا الي (امينه )

طب نعديها ازاي بقي  علشان متبقاش نظام _حاضر بتريح _ ده بقي الي الكتاب بيقوله او الي انا شفته انه عايز يقوله,, حاكم جون غراي ده مش عامله علشان الي عايزين يقوله حاضر اكيد عامله للبوي فرند او لعلاقه مفتوحه او او المهم احنا هناخد منه الي احنا عايزينه

الجمله بقي : تعني اكيد كلنا بيحصل بينا مشاكل كلنا في وقت الضحك بنستحمل بعض لكن وقت الزعل مين بقي الي بصبر الجمله بقي دي هي الحل والبلسم الشافي المؤقت الا ان يتم استرجاع العقل  يعني بعد ما شيطان الغضب يرحل (دهيه لا ترجعه J)

لمزيد من التفاصيل تابعونا في سلسه فزلكه انثي

الحلقه الاولي من فزلكه انثي

فزلكه اريديها مثل امي ولكنها لا تشبهها ...

يظن الرجال ان مطالبهم بسيطه وانهم يسهل ارضاءهم فكل ما يطلبه من انثاه ان تكون ذو جسم رشيق وعقل نبييه لسان مثقف صامته وقتما يريد (غالبا بمعني اصح ) متحدثه وتبهر الاخرين علي المستوي الاسري واحيانا مجالات العمل , لديها من مهارات التواصل مع الاخرين .. ليس لها كثير من الاصدقاء ,, تطهو جيدا تهتم باعمال المنزل وتحافظ علي اظافرها ونضارتها , قلب حنون تتحمل غضبه وزمجرته من حين الي اخر ذكائها عالي فهي تفهمه من غير ان يتحدث وغبيه لا تتعالي عليه بذكاءها وانجازتها ذو دين وملمه باخبار موضه الشارع وما يحدث فيه وغيره ,,,
ارئيتم كم هو سهل الارضاء

شخابيط

مسكت قلمي وشخبطت شخبوطه

نسجت افكاري وطلعت البنوته
سكت الكلام وافتكرت انا حدوته
عن التعلب المكار والست كتكوته
اعترض واتمرد الكتكوت علي الفتفوته

خلها تكسر حيطانها المكبوته

طلعت للدنيا وراحت مخبوطه

في التعلب المكار وراحت مربوطه
في ورطه 

علشان ترجع حره ومبسوطه

انها تعيش العمر مشطوبه

من سطر الاعراب ومثبوته

لسه للحدوته باقيه
بس النهايه كانت منتوته
*****
يمكن في مكان تاني
او حتي زمان تاني

لسه جاي او راح
حزن كان او افراح
هتكرر الحدوته
وتكبر الفتفوته
يمكن يكون السر
في النفس المكبوته

******

اه علي البنات وسننهم

من كام سنه كنت طفله بضفيرتين ولابسه لبس جديد ورايحة  الحضانه اخدو مني الكتب بتاعه الحضانه وادوني كتب سنه اولي  وبقيت في ابتدائي وكنت طفله شطوره وشقيه ومستفزه للبعض, وكا كتير مننا  شايفين ان الولاد دول "صبيانين وحشين " -علي راي بنت  اختي الصغيره- والمدرسين كانوا بياكدولنا فكرتنا لما كانو بيعقبونا كانو بيقعدونا جنب بعض وكل واحد يبقي هيقع من الدسك من كتر مهو قاعد علي اخره خالص..
وخلصنا ابتدائي ورحنا اعدادي مزيج من الطفوله والنضوج المفاجئ في المشاعر فجأه من بعد مكنا بنلعب معاهم بقي قله ادب لو ردنا عليهم اصلا وطبعا ده للمدارس الحكوميه المدراس التانيه هايصه بقي ;)
وتيجي مرحله الثانوي وتسمع عن فلانه الي لسه مكملتش ال 16 سنه اتخطبت والي تيجي تحكي انها اتعكست من مش عارفه مين الي كان معانا في المدرسه   ولا من جارهم ,, ودي مرحله ....التفاخر بقله الادب ...
نيجي بقي  لمرحله الجامعه وهي بمسمي اخر" مرحله شد الحيل" (فاكرين أم نجيبه الاولي علي الثانويه العامه لما قالتلها شدي حيلك وشوفيلك واحد في سنه رابعه ) بالضبط ده الي بيحصل لوعدت سنه اولي ومرتبطيش بواحد من سنه رابعه أو واحد من كليه تانيه  تيجي السنه الي بعدها واخر فرصه في الارتباط بواحد من نفس الدفعه .. وان فاتتك فضاع الارتباط  في الكليه.....!!
وتستمر مرحله شد الحيل بقوه.. وتلاقي خلتك تقولك متشدي حيلك يابنتي...  وصحبتك الي اتخطبت من ايام الثانويه فاكرنها تقولك مفيش اخبار.. تقومي بكل براءه تسالي نفسك .....الي هو اعمل ايه..؟؟!!
وتبدا مرحله التصدق( جايه من الصدقه يعني) من كل قريب وبعيد علي اساس ان قبل ما يفوتك القطر... الي تجود بابن خالتها الي عنده شقق وطالع بيها السما رغم ان عليها لسه اقساط ومحلتوش( اللضا) انه يفرشها ... والي تجبلك اخوها الي اخلاقه بايظه  علشان ينصلح حاله (علي اعتبار انك مؤسسه اصلاح)  ,,, والي تجبللك بن خاله  اخت جوز اختها  ,,, وفي الحاله دي ادامك حاجه من الاتين ترفضي وساعتها هيتقال عليكي متنططه,,, او تقبلي كل من هب ودب وساعتها هتتخطبي اربع خمس مرات علي ما تلاقي نصيبك.. وجالك اكتئاب وتطلعي عين  الي جايلك :) وبرضه هتلاقي واحد يقولك ,,,_ ويجي واحد يقولك انا عايز واحده متخطبتش قبل كده (ابقي فصلها )_  ففي النهايه احب اقولكم...............ولا بلاش ..؟

 ولا هقول... ع ابوهم كلهم

 

واصبحت امراه

اول ايام امومتي ... ادركت حينها انني اصبحت امرأه.. كلما فات كل طفولتي واليوم اكتملت انوثتي واصبحت اما
صرخات طفلي وتربيتي علي كتفيه وابتسمته لي تكفيني وتلهيني عن الدنيا وتسكرني بلا خمرا  ...
طعم الله كل انثي بملاكا يشعرها بوجودها ...

ثوره تايهه ياولاد الحلال

كان في ظلم كان في موت ,, كان في غم وكنت مكتوم ياصوت ... وفجأه وسط الغمام فجأه وسط السكوت..
هبت رياح الثوره ..هبت في وش  الأعادي ..وضحكت وشوش بتودع حياتها بكرامه ..ضحكت قلوب أهاليها وهتفت راح زمن المهانه,,
وبعد سنه او اكتر رجعنا تاني نقول "ثوره تايهه ياولاد الحلال"
يقولولي: لا ياواد ده لسه جاي رئيس .. هيحقق مطالبنا ونهيص.. وتعيش في بلدك ولاا العريس والعلم يرجع في الكراريس...
وانا ارجع تاني وافتكر فيلم هميس لما يرموها في النيل.. وكمان في فيلم الهاويس ..والارض عطشت اكتر وشربت دمنا اكتر وقصاد كده متلاقيش ..حرق ومؤامرات وغير كده مفيش ...
وارجع الحق كلام :حد شاف ثوره ياولاد الحلال.. حد شافها؟  لو عرفت الحل اتصل بقبور الشهداء وقولهم دمك مرحش...اونطه

انا وقح ...اذن انا موجود

نحيا في زمن الوقاحه ..يمجد فيه طويل اللسان علي انه صاحب الافكار الرائعه والاراء السليمه  ...يخلط فيه بين صراحه القول وجراءته وبين وقاحه القول وسفالته ..انتشرت علي كل سبل النشر اقاويل لاترقي لمسمي مقالات  تحت مبدأ " انا اسب اذن انا موجود" "انا طويل اللسان اذن انا مثقف" "انا وقح اذن انا جرئ" .

لا افرق في هذا بين ذكر او انثي فمن شر البليه ان اري من تدعي انها انثي تتلفظ بالفاظ نابيه مدعيه خطورة القضية التي تتحدث فيها وانها لا تجد من بشاعه القضية الفاظ غير تلك لتصفها بها.
ولعلي ارجع سبب ذلك الي التستر وراء الشاشات وراء اليوزرات الوهميه ...واتخذها غطاء لماء الوجه ,,مع افتراض انه لو قابلناهم في الواقع سنجدهم يتخذون غير الوقاحه منهاجا ..
او ان سبب ذلك الانجراف وراء الوقحيين واتخذهم قدوه فتري السياسي ان جاز التعبير في الكتاب او الجريده يسب ويشتم والناس تصفق له فرحا - تري هل نحن قوما نستلذ بالوقاحه؟ -  وينجح وما الي ذلك ..فيبقي السؤال لما لا اكون مثله لربما صفقوا لي ...

الجيل الصاعد

الجيل الصاعد (وطني)

عاش الجــيل الصاعد ... عاش
جيل من شعب مجاهد .... عاش
عاش يبني ويجاهد   عاش بكفاحه الخالد
راجل واحد مبدأ واحد
عاش جيل ثورتنا عاش
عاش الجندي يوم  ما حطم شوكة الإسـتعمار
كان عنوان النصر الثوري في كل بلد أحرار
وسـمعناه بيقولها قوية باسم مبادئ أمة أبيّة
أنا خط هجوم ودفاع  أنا رمز سلام وصراع
أفدي بالروح وأعيش في النصر بطل وشجاع
حيوا معاي  قولوا معايا
عاش الجندي العربي عاش
نجاة الصغيرة:
عاش الزارع يوم الشمس ما حست بيها عينيّ
فرشت نورها وكبر الزرع  وهو مداري عليّ
وسمعناه بيقولها قوية أرض ولادي ورجعت ليّ
حرمونا سنين وســــنين  وافتكروا الناس نايمين
وطلعنا عليهم يوم خلصنا حقوق ملايين
حيوا معاي  قولوا معاي
عاش فلاح الثورة عاش
عبد الحليم:
عاش الفن حضارة لأمة يبنيها الفنان
يروي حياتها في غنوة في كلمة
في صورة بروح وإيمان
وســمعناه بيقولها قوية  مجد بلادي عهد علي
قلبي وروحي ملك لفني والإتنين لبلادي هدية
حيوا معاي  قولوا معاي
عاش الفن رسالة عاش
فايزة أحمد:
عاش العامل يوم  ما  فكر يبني لبلده دار
فيها مداخن طالع  منها  لهب النور والنار
وسمعناه بيقولها قوية
ده إنتاجي وصنع إيدي
حققنا بعون الله للشعب دعاه ومناه
والخير زاد منا وفاض والفايض صدرناه
قولوا معاي  حيوا معاي
عاش عاش العامل عاش
عاش الطالب يوم ما طلب العلم كتاب وسلاح
عرف العلم وســـــيلة تحقق غــــاية كل نجاح
وســـمعناه بيقولها قوية
في الإعدادي وفي الكلية
العلم ســـــــلاح جبار بيحول ليلنا نهار
يسعى للنور بالنور ويواجه النار بالنار
عبد الوهاب:
عاش الشعب العربي كله شعب سلام وأمان
عاش الوعي العربي كله ثورة في كل مكان
ثورة مـــارد للحرية
هب ونادى بالقومية
ردينا عليك يا جمال وإيدينا ف إيديك يا جمال
وطلعنا معاك يا جمال     نبني وياك يا جمال
حيوا معاي قولوا معاي
عاش عبد الناصر عاش

كلمات: حسين السيد
ألحان: محمد عبدالوهاب
مقام: نهوند
تاريخ: 1961